{ 1 }
देह साजी भली, बहू लाजी भली !!
लूवां बाजी भली, नौबत गाजी भली !
गाय दूजी भली, गवर पूजी भली !!
जोबन जोड़ी भली, कच्छी घोड़ी भली !
मौत मोड़ी भली, मंसा थोड़ी भली !!
अंब केरी भली, माळा फेरी भली !
कांठळ काळी भली, खेत पाळी भली !!
चौक नाळी भली, घीणै छाळी भली !
घाव पाटी भली, भाख फाटी भली !!
बिरखा वूठी भली, नांगै मूठी भली !
आई तूठी भली, विपता खूटी भली !!
मैथी फाकी भली, साख पाकी भली !
पंथ गाड़ी भली, भैंस पाडी भली !!
प्रीत गाढ़ी भली, भींत जाडी भली !
बात सांची भली, पोथी बांची भली !!
{ 2 }
आपणा बडेरा कहेग्या :~
बाग बिगाड़े बांदरो, सभा बिगाड़े फूहड़ !
लालच बिगाड़े दोस्ती, करे केशर री धूड़ !!
जीभड़ल्या इमरत बसै, जीभड़ल्या विष होय !
बोलण सूं ई ठा पड़े, कागा कोयल दोय !!
चंदण री चिमटी भली, गाडो भलो ना काठ!
चातर तो एक ही भलो, मूरख भला ना साठ !!
गरज गैली बावळी, जिण घर मांदा पूत !
सावण घाले नी छाछड़ी, जेठा घाले नी दूध !!
पाडा, बकरा, बांदरा, चौथी कुल्टा नार !
इतरा तो भूखा भला, धाया करै बोबाड़ !!
भला मिनख ने भलो सूझै, कबूतर ने कुओं!
अमलदार ने एक ही सूझै, किण घर कुण मुओ !!
{ 3 }
तपे तावड़ो आकरो, तालरिया में ठाठ !
समदां उफणी बादळी, खेतां मुळकियो जाट !!
तपियो आकरो जेठ जद भीग्यो हो आषाढ़ !
हळियो धरियो कांधै पर खेतां चालियो जाट !!
उत्तर दिशा री बादळी नाँखे मोटी छांट !
मोती बरस्या आंगणे राजी हुयो जाट !!
उगियो धान खेत में धरती खोलिया कपाट !
लूरां लैवे जाटणी, तेजो गावे जाट !!
मैणत मीठी मतवाळी, गावे चारण भाट !
आशीष देवे आंतरा, जुग जुग जीये जाट !!
नीं होवे सिर फोड़िया सोलह दूणी आठ !
बुद्धि है बत्तीस गुणा, कर दिखावे जाट !!
मेड़ी बैठी जाटणी, खेत बिचाळे खाट !
कण कण रमै रामजी जद हळियो खड़े जाट !!
घी घाले जद जाटणी, मीठी लागे घाट !
खाता खायी जीभड़ी, भरपेट जीमै जाट !!
धरती थारो काळजो, है शंकर रो ललाट !
थारी लाज राखण नै महादेव बणाया जाट !!
